Такія турніры заўсёды выклікаюць цікавасць як у іх удзельнікаў, так і ў заўзятараў. Першыя атрымліваюць магчымасць успомніць маладосць, акунуцца ў атмасферу рызыкі і бескампраміснай барацьбы, другія - зноў ўбачыць на пляцоўцы сваіх куміраў. Ветэраны Чэрвеньскага футбола не расчаравалі прыхільнікаў. Кожны матч з іх удзелам трымаў у напружанні да апошніх секунд.
У першай сустрэчы супернікамі нашай каманды былі геаграфічныя суседзі з Беразіно. Менавіта яны адкрылі лік у матчы, аднак яшчэ да перапынку гаспадары пляцоўкі здолелі адыграцца: вызначыўся Аляксей Сасункевіч. А ў другім тайме Яўген Канашэвiч забіў пераможны для чэрвенцаў мяч - 2:1. З такім жа лікам нашы ветэраны адолелі мінскую каманду «Ваенная акадэмія»: галы на рахунку Сяргея Канцура (з пенальці) і Яўгена Канашэвiча.
Каб захаваць шанцы на перамогу ў турніры, чэрвенцам ў трэцім матчы трэба было выйграваць у каманды з Барысава. За два дзесяткі секунд да фінальнай сірэны лік на табло быў нічыйным - 0:0. І ўсё ж адзін дакладны ўдар па нашых варотах прынёс вікторыю барысаўчанам. А разам з ёй - і першае месца ў спаборніцтвах.
Свой апошні матч нашы ветэраны праводзілі з камандай Беларускай федэрацыі футбола. Пераможца гэтай сустрэчы быў сярэбраным прызёрам турніру, які прайграў - бронзавым. Лік у гульні адкрыў футбаліст чэрвенскай каманды Аляксандр Лалаеў, але мінчане хутка адыграліся. У рэшце рэшт, лёс матчу на карысць чэрвенцаў вырашыў дубль Сяргея Канцура. Спачатку ён вынікова завяршыў контратаку нашай каманды, а потым, калі футбалісты федэрацыі, перайшлі на гульню ў пяць палявых гульцоў, закаціў мяч у іх неабароненыя вароты.
Уладальнікамі сярэбраных медалёў сталі Сяргей Купровіч, Аляксей Сасункевіч, Сяргей Канцура, Яўген Канашэвiч, Аляксандр Лалаеў, Вячаслаў Целяціцкі і Віталь Манулік. Акрамя таго, галкіпер чэрвенцаў Сяргей Купровіч, які прапусціў на турніры менш за ўсіх мячоў, атрымаў прыз лепшага гульца каманды.
Ігар Адамовіч. Фота аўтара
Карта сайта